राष्ट्रिय प्राकृतिक स्रोत तथा वित्त आयोग ले सार्वजनिक गरेको पछिल्लो कार्यसम्पादन मूल्यांकन नतिजाले सोलुखुम्बु जिल्ला का स्थानीय तहमध्ये सोलुदुधकुण्ड नगरपालिका अग्रस्थानमा रहेको देखाएको छ। आर्थिक वर्ष २०८१/८२ का लागि गरिएको मूल्यांकनमा सोलुदुधकुण्डले ७८.५० अंक हासिल गर्दै कोशी प्रदेशकै उत्कृष्ट प्रदर्शन गरेको जनाइएको छ।
आयोगले प्रदेश र स्थानीय तहको कार्यसम्पादन मूल्यांकन कार्यविधि २०७८ अनुसार १७ वटा सूचक प्रयोग गरी मूल्यांकन गरिएको जनाएको छ। सोही क्रममा थुलुङ दुधकोशी गाउँपालिका ले ६३.७९ अंक प्राप्त गर्दै दोस्रो स्थान ओगटेको छ भने माप्य दुधकोशी गाउँपालिका ले ६३.२६ अंक प्राप्त गरेको छ। त्यसैगरी खुम्बु पासाङल्हामु गाउँपालिका ६२.३६ अंकसहित अगाडि देखिएको छ।
यसै सूचीमा महाकुलुङ गाउँपालिका ले ५७.८१ अंक, लिखु पिके गाउँपालिका ले ५४.४३ अंक, नेचासल्यान गाउँपालिका ले ५१.६३ अंक र सोताङ गाउँपालिका ले ५१.३४ अंक प्राप्त गरेका छन्।
आयोगका अनुसार स्थानीय तहहरूले आफैंले गरेको प्रारम्भिक मूल्यांकनलाई पुनः परीक्षण गरी अन्तिम प्रतिवेदन तयार गरिएको हो। मूल्यांकनका क्रममा स्थानीय सरकारले कानुनअनुसार प्रत्येक वर्ष असार १० भित्र सम्बन्धित सभा समक्ष बजेट प्रस्तुत गरे–नगरेको विषयलाई महत्वपूर्ण सूचकको रूपमा लिइएको छ। साथै असार मसान्तभित्र बजेट पारित भए–नभएको अवस्थालाई पनि छुट्टै आधार बनाइएको छ।
यससँगै घरजग्गा दर्ता शुल्क, मनोरञ्जन कर तथा विज्ञापन करबाट संकलित रकम प्रदेश सरकारलाई हस्तान्तरण गरिएको अवस्था, बजेट कार्यान्वयनको प्रगति, राजस्व संकलनको लक्ष्य उपलब्धि, लेखापरीक्षणको अवस्था तथा आवधिक योजनाको कार्यान्वयन अवस्थालाई समेत मूल्यांकनमा समावेश गरिएको जनाइएको छ।