फागुन ५ सोलुखुम्बु

सोलुखुम्बु क्षेत्रको पर्यटन प्रवर्द्धन गर्ने उद्देश्यले फाप्लु विमानस्थललाई हवाई उडानको मुख्य केन्द्र बनाउने प्रस्ताव अघि सारिएको छ। पर्यटन सिजनमा खुम्बु क्षेत्रको मौसम बारम्बार परिवर्तन हुँदा हवाई उडानहरू रद्द हुने समस्याले पर्यटन क्षेत्रमा असर पुर्याइरहेको छ। विशेष गरी, फाप्लुमा नियमित उडान नहुँदा तल्लो सोलुखुम्बु क्षेत्रको पर्यटन प्रभावित हुँदै आएको छ, जसले स्थानीय यात्रुहरूको हवाई यात्रा र आकस्मिक उद्धारमा समेत चुनौती सिर्जना गरेको छ।

हाल लुक्लाका लागि रामेछापको मनथली विमानस्थलबाट उडान सञ्चालन हुने गरेको छ, जसले यात्रुहरूलाई समय र अतिरिक्त लागतको समस्या सिर्जना गर्दै आएको छ। फाप्लु विमानस्थलको प्रयोग न्यून हुँदा सोलुखुम्बुको पर्यटन विकासमा अवरोध पुगिरहेको सन्दर्भमा, यसलाई नियमित हवाई उडानको केन्द्र बनाउन सोलुदुधकुण्ड नगरपालिकाले पहल थालेको छ।

नगर प्रमुख नाम्गेल जाङबु शेर्पाले नेपाल आयल निगम र विभिन्न एयरलाइन्सहरूसँग समन्वय गरी फाप्लु विमानस्थलमा हवाई इन्धन रिफ्युलिंग सेन्टर स्थापना गर्ने प्रक्रिया अघि बढाइरहेको जानकारी दिएका छन्। यदि फाप्लु विमानस्थलमा इन्धन आपूर्ति सहज हुने हो भने, यहाँबाट काठमाण्डौ-फाप्लु र फाप्लु-लुक्ला सिधा उडान सञ्चालन गर्न सकिनेछ। यसले पर्यटनलाई प्रवर्द्धन गर्नुका साथै आकस्मिक उद्धारमा पनि ठूलो सहयोग पुग्ने अपेक्षा गरिएको छ।

नगर प्रमुख शेर्पाले भन्नू भयो, “फाप्लु विमानस्थललाई हवाई उडानको प्रमुख केन्द्र बनाउन सकियो भने यस क्षेत्रको पर्यटन उद्योगमा ठूलो फड्को मार्न सकिन्छ। हामी नेपाल आयल निगम र एयरलाइन्सहरूसँग विशेष पहल गरिरहेका छौं।”

स्थानीय पर्यटन व्यवसायीहरूले पनि यस योजनालाई स्वागत गरेका छन्। उनीहरूको भनाइमा, यदि फाप्लु विमानस्थलमा हवाई इन्धन रिफ्युलिंग सेन्टर स्थापना भएमा सोलुखुम्बु क्षेत्रको पर्यटन नयाँ उचाइमा पुग्नेछ। यस योजनाले खुम्बु क्षेत्रको मौसमजन्य हवाई समस्या समाधान गर्दै, सोलुखुम्बु जिल्लाको पर्यटन प्रवर्द्धनमा महत्वपूर्ण योगदान पुर्याउने विश्वास गरिएको छ।