काठमाडौं, २०८२ असार १५: आज नेपाली समाजले परम्परागत रूपमा राष्ट्रिय धान दिवस तथा रोपाइँ महोत्सव मनायो। “दही चिउरा खाने दिन” को रूपमा पनि परिचित यस दिन खेतका गराहरूमा किसानको पसिना र गीत गुन्जिए। तर, यस वर्षको असार पन्ध्रले नेपाली माटोको सुगन्धसँगै खेलकुद मैदानमा ‘रन र गोलको वर्षा’ गराउँदै एउटा अनुपम उत्साह थप्यो। क्रिकेट र फुटबल दुवै विधामा नेपाली टोलीले दर्शनीय प्रदर्शन गर्दा राष्ट्रिय गौरवको अनुभव भयो।

क्रिकेटमा कीर्तिमानी रनको पहाड:यू–१६ टोलीको जादुई प्रदर्शन

आज एसीसी यू–१६ इस्ट जोन कपमा नेपाली युवा क्रिकेट टोलीले कीर्तिमानी प्रदर्शन गर्दै इन्डोनेसियाविरुद्ध ४२१ रनको विशाल योगफल खडा गर्‍यो। यो नेपाली युवा क्रिकेटको इतिहासमै एक अविस्मरणीय कीर्तिमान हो। ‘रनको वर्षा’ भएको यस खेलमा प्रसिद्ध जैसीले १३२ रन, परिमार्जन यादवले ७१ रन र जोय थापाले ५७ रनको अर्धशतकीय योगदान दिए।

नेपालले दिएको ४२१ रनको लक्ष्य पछ्याएको इन्डोनेसिया ५१ रनमा अलआउट हुँदै ३७० रनको विशाल अन्तरले पराजित हुन पुग्यो। यो जितले नेपाली युवा क्रिकेटको भविष्य उज्ज्वल रहेको संकेत गर्दछ।

फुटबलमा ‘गोलको वर्षा’: महिला टोलीको सानदार जित

असार पन्ध्रको उल्लासमय माहोलमा नेपाली राष्ट्रिय महिला फुटबल टोलीले पनि इतिहास रच्यो। एएफसी महिला एसियन कप छनोट अन्तर्गत लाओसविरुद्धको खेलमा नेपालले ९–० को सानदार जित दर्ता गर्‍यो। नेपाली महिला टोलीको १०० औं अन्तर्राष्ट्रिय खेलको अवसरमा प्राप्त यो जित साँच्चिकै ‘गोलको वर्षा’ सरह थियो।

यस खेलकी नायक साबित्रा भण्डारी ‘साम्बा’ले एक्लैले चार गोल गर्दै आफ्नो उत्कृष्ट लयलाई निरन्तरता दिइन्। अनिता बस्नेत, सरु लिम्बू, अनिता केसी र रश्मीकुमारी घिसिङले एक-एक गोल गर्दा लाओसबाट एक आत्मघाती गोल उपहार मिल्यो। यो विशाल जितले नेपाली महिला फुटबललाई एसियाली स्तरमा थप प्रतिस्पर्धात्मक बनाउन बल पुर्‍याएको छ।

असार पन्ध्रको दोहोरो उत्सव

सामान्यतया धान दिवसमा किसानहरूले “छेरौँला र रोपौँला” भन्ने उखानलाई चरितार्थ गर्दै हिलोमा रमाइलो गर्छन्। यस वर्ष भने खेतका गरामा धान रोप्ने उत्साहसँगै खेल मैदानमा नेपाली टोलीले रन र गोलको कीर्तिमान रच्दै दोहोरो उत्सव मनायो।

आजको असर १५ ले परम्परा र आधुनिकता, कृषि र खेलकुदलाई जोड्दै नेपाली समाजमा सकारात्मक ऊर्जा प्रवाह गरेको छ।

लेखक

Tek Bahadur Khatri