दिक्तेल, खोटाङ । खोटाङ जिल्लाकै अग्रणी शैक्षिक संस्था “दिक्तेल इङ्लिस सेकेण्डरी बोर्डिङ स्कूल” (DESBS) ले शैक्षिक गुणस्तर अभिवृद्धिका लागि ग्लोबल क्वालिटी काउन्सिल (GQCO) सँग दोहोरो सम्झौतामा हस्ताक्षर गरेको छ । १८ गते सोमबार सम्पन्न कार्यक्रममा विद्यालयका प्रधानाध्यापक धनकर्ण श्रेष्ठले विद्यालयले गुणस्तरीय शिक्षा प्रदान गर्न कुनै कसर बाँकी नराख्ने प्रतिबद्धता व्यक्त गर्नुभयो ।

इन्टरनेसनल अर्गनाइजेसन फर स्ट्यान्डराइजेसन (ISO) का नेपाल प्रतिनिधि तथा ग्लोबल क्वालिटी काउन्सिलका सुदीप शर्माले विद्यालयका शिक्षक तथा कर्मचारीहरूलाई गुणस्तर सम्बन्धी विशेष प्रशिक्षण प्रदान गर्नुभयो । उहाँले शिक्षामा गुणस्तर कायम राख्न व्यवहारमा नै लागू गर्नुपर्ने कुराहरूलाई प्राथमिकताका साथ कार्यान्वयन गर्नुपर्ने औंल्याउनुभयो भने प्रशिक्षण सत्रमा ISO 21001:2018 को महत्व, विद्यालयमा यसको प्रभावकारी कार्यान्वयन, शिक्षकहरूको भूमिकालगायतका विषयमा विस्तृत जानकारी दिनु भएको थियो ।

काउन्सिलका अर्का प्रतिनिधि तथा क्वालिटि अडिटर सूर्य केसीले स्कूलमा सरसफाईसम्बन्धी विशेष प्रस्तुति दिनुभयो । उहाँले शौचालयदेखि अफिसको टेबलसम्म सफा राख्नुपर्ने, स्वच्छ वातावरणले स्वास्थ्य र सिकाइ प्रक्रियामा सकारात्मक प्रभाव पार्ने र ISO मापदण्ड अनुरूप सफाइ अभियान सञ्चालन गर्नुपर्ने कुरामा जोड दिनुभयो ।

ISO 21001:2018 को कार्यान्वयनपछि विद्यालयले अन्तर्राष्ट्रिय गुणस्तरका मापदण्डहरू पालन गर्दै शिक्षा प्रणालीमा निरन्तर सुधार गर्ने, विद्यार्थी केन्द्रित शिक्षण तथा शिक्षण प्रक्रियाको प्रभावकारीता वृद्धि गर्ने लक्ष्य लिएको छ । विद्यालय प्रशासनले शिक्षकहरूको क्षमता अभिवृद्धि, विद्यार्थीहरूको सिकाइ अनुभव सुधार, व्यवस्थापन प्रणालीलाई थप प्रभावकारी बनाउने जस्ता कार्यलाई प्राथमिकताका साथ अघि बढाउने बताएको छ ।

खोटाङ जिल्लामा गुणस्तरीय शिक्षाको पहिचान बनाउँदै आएको दिक्तेल इङ्लिस सेकेण्डरी बोर्डिङ स्कूल विगत केही वर्षयता डिजिटल प्रविधिहरूको प्रयोगमा अग्रसर रहँदै आएको छ । विद्यालयले स्मार्ट आईडी कार्ड सिस्टम, डिजिटल हाजिरी, स्मार्ट बोर्ड र सूचना-प्रविधिमैत्री शिक्षण प्रणाली लाई प्राथमिकता दिएको छ । यसै क्रममा, विद्यालयले ISO 21001:2018 को कार्यान्वयन गर्दै शिक्षामा गुणस्तर कायम राख्ने अभियानलाई अझ मजबुत बनाएको छ ।

ग्लोबल क्वालिटी काउन्सिल (GQCO) ले शिक्षा क्षेत्रमा गुणस्तर व्यवस्थापन र अन्तर्राष्ट्रिय मान्यता प्राप्त शिक्षा प्रणालीको विकासमा लामो समयदेखि कार्य गर्दै आएको छ । यस सम्झौतासँगै दिक्तेल बोर्डिङ स्कूलले शिक्षण प्रणालीमा सुधार, विद्यार्थीहरूको सिकाइ अनुभव सशक्तिकरण र व्यवस्थापन प्रणालीलाई थप प्रभावकारी बनाउने लक्ष्य लिएको छ ।