फागुन ११, २०८१ दिक्तेल, खोटाङ । दिक्तेल बोर्डिङमा परिवर्तन संघको आयोजना तथा विद्यालयको सहकार्यमा लागूपदार्थ दुर्व्यसनविरुद्ध जनचेतनामूलक कार्यक्रम सम्पन्न भएको छ । कार्यक्रममा परिवर्तन संघका सदस्यहरूले नृत्य, गायन, र नाटकमार्फत विद्यार्थीहरूलाई लागूपदार्थको हानिबारे जनचेतनामूलक कार्यक्रम सञ्चालन गरेका हुन् । जसमा कक्षा ५ देखि १२ सम्मका विद्यार्थी तथा शिक्षकहरू गरी करिब ७०० जना उपस्थित थिए ।

विद्यालयका प्रिन्सिपल धनकर्ण श्रेष्ठले केवल नङ र कपाल पाल्नु मात्र नभई विद्युतीय उपकरणको लतसमेत बढ्दै गएको उल्लेख गर्दै यस्ता कुलतहरूलाई रोक्न आवश्यक रहेको कुरामा जोड दिनुभयो । प्रमुख अतिथि गेह कुमार सैंजूले देवानन्दको फिल्मको उदाहरण दिँदै लागूपदार्थ दुर्व्यसनले कसरी व्यक्ति तथा परिवारलाई असर पार्छ भन्ने विषयमा विद्यार्थीहरूलाई महत्त्वपूर्ण सन्देश दिनुभयो । परिवर्तन संघका केन्द्रीय अध्यक्ष ओसन राईले आफ्ना अनुभवहरू सुनाउँदा उपस्थित विद्यार्थी तथा शिक्षकहरूको आँखा रसाएका थिए ।

कार्यक्रममा परिवर्तन संघले ‘Fight for yourself against drugs’ नाराका साथ युवाहरूलाई कुलतबाट जोगाउने सन्देश दिएको थियो । यस सचेतनामूलक कार्यक्रमलाई विद्यालयले पनि समर्थन गर्नुका साथै सहयोगस्वरूप परिवर्तन संघलाई रु. १०,००० प्रदान गरेको छ ।

परिवर्तन संघले यस्ता जनचेतनामूलक कार्यक्रमहरू विभिन्न विद्यालय तथा समुदायमा निरन्तर सञ्चालन गर्दै आइरहेको  छ ।  विशेष गरी युवाहरूलाई लागूपदार्थ दुर्व्यसनको असरबारे सचेत गराउँदै उनीहरूलाई सही मार्ग अपनाउन प्रेरित गरिरहेको छ । यस प्रेरणादायी कार्यक्रमले विद्यार्थीहरूलाई जागरूक बनाउन महत्त्वपूर्ण भूमिका खेलेको विद्यालय प्रशासनले जनाएको छ ।