दिक्तेल रूपाकोट मझुवागढी नगरपालिकाले आयोजना गरेको अन्तरमाध्यमिक विद्यालयस्तरीय तेस्रो राष्ट्रपति रनिङ शिल्ड प्रतियोगितामा दिक्तेल इंग्लिस सेकेन्डरी बोर्डिङ स्कुलले उपाधि जितेको छ । नगरपालिकाभित्रका २४ माध्यमिक विद्यालय सहभागी प्रतियोगितामा १८ स्वर्ण, १८ रजत, र १९ कांस्य पदक जित्दै दिक्तेल बोर्डिङ शीर्ष स्थानमा रह्यो ।

जिल्लाको प्रमुख व्यापारिक केन्द्र दिक्तेल बजारस्थित माटीकोरे खेलमैदान तथा जनजागृति मा विको खेलमैदानमा आयोजित प्रतियोगितामा सरस्वती माध्यमिक विद्यालय दिक्तेल दोस्रो स्थानमा रह्यो । उसले १० स्वर्ण, १० रजत, र ११ कांस्य पदक जित्यो ।

चार दिनसम्म चलेको यस प्रतियोगितामा जनजागृति आवासीय विद्यालय सोल्माले ९ स्वर्ण, ६ रजत, र ५ कांस्य पदकसहित तेस्रो स्थान हासिल गर्‍यो । यस्तै, श्री माध्यमिक विद्यालय बाँसबोटे लफ्याङले ५ स्वर्ण, ४ रजत, र २ कांस्य जित्दै चौथो स्थान प्राप्त गर्‍यो । माउन्ट एभरेस्ट बोर्डिङ स्कुल दिक्तेलले ३ स्वर्ण, १ रजत, र ७ कांस्य जित्दै पाँचौँ स्थान हासिल गर्‍यो ।

प्रतियोगितामा भलिबल, एथलेटिक्स, कबड्डी, सितोरियो कराँते, र तेक्वान्दो सहित पाँच विधाका ४९ इभेन्टमा प्रतिस्पर्धा भएको थियो ।

जनजागृति आवासीय माध्यमिक विद्यालय सोल्माको व्यवस्थापनमा सम्पन्न प्रतियोगितामा ५४ स्वर्ण, ५४ रजत, र ७८ कांस्य पदकका लागि ६३२ विद्यार्थीले प्रतिस्पर्धा गरेका थिए। व्यवस्थापन गर्ने विद्यालयका व्यवस्थापन समिति अध्यक्ष सूर्यबहादुर राईका अनुसार, प्रतियोगिता सफलतापूर्वक सम्पन्न भएको हो ।

विजेता विद्यालयलाई रनिङ शिल्ड, र प्रमाणपत्र नगरप्रमुख तीर्थराज भट्टराईद्वारा प्रदान गरियो । उपविजेता तथा विधागत विजयी विद्यालयहरूलाई ट्रफी, मेडल, र प्रमाणपत्र विभिन्न व्यक्तित्व बाट प्रदान गरियो ।
उक्त शिल्डलाई अर्को वर्ष रनिङ शिल्ड आयोजना गर्ने विद्यालयले रू . २१ हजार १११ नगदमा किन्नु पर्ने छ ।

जिल्ला समन्वय समितिका प्रमुख सनबहादुर राई, नगर प्रमुख तीर्थराज भट्टराई, उपप्रमुख बिसन राई लगायतले विजेता विद्यालयलाई पुरस्कार हस्तान्तरण गरेका थिए । प्रतियोगीता माटिकोरे खेलमैदानमा कोशी प्रदेशका सामाजिक विकास मन्त्री पाँचकर्ण राईले माघ ११ गते उद्घाटन गरेका थिए ।
तेस्रो राष्ट्रपति रनिङ शिल्ड प्रतियोगिता सञ्चालनका लागि नगरपालिकाले रु. १० लाखको आर्थिक सहयोग गरेको र सहभागी विद्यालयलाई खेल सामग्री तथा यातायात खर्चसमेत उपलब्ध गराएको नगरपालिकाका कर्मचारी सुवासचन्द्र राईले जानकारी दिनुभयो ।