टेक बहादुर खत्री; राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध सहकारी ठगी प्रकरणमा आज दर्ता गरिने भनिएको मुद्दा प्राविधिक कारणले रोकिएको छ ।

जिल्ला सरकारी वकिल कार्यालय, रुपन्देहीका प्रमुख एवं न्यायाधीवक्ता प्रेमराज पौडेलका अनुसार, अन्तिम तयारी भए पनि केही प्राविधिक समस्याका कारण आज दिउँसो ३ बजेसम्म मुद्दा दर्ता गर्न सम्भव भएन । स्रोतका अनुसार, पुरानो मुद्दाको मिसिल सर्वोच्च अदालतमा रहेको र त्यो मिसिल नफर्किएकाले प्रक्रिया पूरा गर्न ढिलाइ भएको हो ।

रवि लामिछानेमाथि सुप्रिम बचत तथा ऋण सहकारी संस्थाको रकम अपचलन गरेको आरोप लागेको छ । उनीमाथि व्यक्तिगत रूपमा २ करोड र गोर्खा मिडियाका नाममा सामूहिक रूपमा २ करोड १५ लाख २८ हजार गरी ४ करोड १५ लाख २८ हजार रुपैयाँ बिगो दाबी गरिएको छ ।

त्यस्तै, पूर्व डीआइजी छविलाल जोशीविरुद्ध २ करोड ५० लाख व्यक्तिगत र मिडियाको सामूहिक रूपमा १ करोड ७७ लाख ८८ हजार गरी ४ करोड २७ लाख ७८ हजार रुपैयाँ बिगो दाबी गरिएको छ ।

मुद्दा दर्ताको पृष्ठभूमि

प्रहरीले एक साताअघि नै अनुसन्धान प्रतिवेदन जिल्ला सरकारी वकिल कार्यालयमा बुझाइसकेको थियो । त्यसपछि कार्यालयले अभियोग पत्र तयार गरेको हो । यसअघि, पोखराको सूर्यदर्शन सहकारी ठगी प्रकरणमा पनि लामिछाने र जोशीविरुद्ध सहकारी ठगी, संगठित अपराध, र सम्पत्ति शुद्धीकरणको अभियोग दर्ता भएको थियो ।

लामिछाने ६५ लाख धरौटीमा रिहा भएका थिए भने काठमाडौँ जिल्ला अदालतमा थप थुनछेक बहसपछि ६० लाख धरौटीमा पनि रिहा भएका थिए । जोशी भने अझै काठमाडौँ अदालतमा उपस्थित भएका छैनन् ।

रुपन्देहीमा मुद्दा दर्तापछि रवि लामिछाने आफैँ उपस्थित हुने बताइएको छ ।