तराईका पाँच स्थानको भिजिबिलिटी १०० मिटर, नेपालगन्ज र धनगढीको एकहजार माथि

- माघ ४, २०८१ १०:२९ मा प्रकाशित

काठमाडौं । नेपालको तराई क्षेत्रमा बाक्लो हुस्सु र कुहिरोले अधिकांश स्थान ढाकेको छ । आज बिहान ५:४५ बजे संकलन गरिएको विवरणअनुसार, धनगढी र नेपालगन्जमा पारदर्शिता (भिजिबिलिटी) तुलनात्मक रूपमा राम्रो देखिएको छ ।

मौसम पूर्वानुमान महाशाखाका मौसमविद् सरोज पुडासैनीका अनुसार धनगढीको भिजिबिलिटी १,५०० मिटर रहेको छ भने नेपालगन्जको १,२०० मिटर रहेको छ । तर, घोराही, भैरहवा, सिमरा, जनकपुर, र विराटनगरका क्षेत्रमा भिजिबिलिटी निकै कमजोर छ ।

यी स्थानहरूको पारदर्शिता केवल १०० मिटरमा सीमित रहेको मौसमविद् पुडासैनीले जानकारी दिएका छन् ।उनका अनुसार, “पारदर्शिता १ किलोमिटरभन्दा कम भएमा कुहिरो र १ देखि ५ किलोमिटरसम्म भएमा हुस्सु मानिन्छ ।”

तराई क्षेत्रमा बाक्लो हुस्सु र कुहिरोका कारण जनजीवन प्रभावित भइरहेको छ । यातायातमा समस्या सिर्जना भएको र मानिसहरूको दैनिक क्रियाकलापमा असर परिरहेको छ ।

What’s your Reaction?